Wednesday, May 22, 2013

INDIANA ZIN THU



 May 17 2013 (Friday) zing dar 4 ah kan tho va, kan insiam sawk sawk a, dar ngaah kan chhuak thei a, Dini leh Sawna chu motorah an mu lut nghal a. Kan tlan vang vang a, Pittsburg, PA te tlan pelin kan kal zel a. darkar 5 zet kan drive hnu chuan Cleveland, Ohio zawn kan thleng ta der a. Dini mu chu a lo tho a, " Khawnge kan awm?" a rawn ti a. Kei chuan, "Cleveland ah,"  ka lo ti a. "Rock n Roll Hall of Fame ah kal ila," a rawn tifiam a. kar khat lek liam ta khan Dini te school ho chu he hmunah hian an kal tawh a. Hman kum khan Dini bawk hi an school a Rock Band ho an kal tawh bawk a. A la kal ning lo a ni ngei ang. Dini fiamthu titak chu kan ngaihdan a lo ni ta tlanga, ti chuan tum lawk engmah awm lovin downtown Cleveland chu kan pan ta nghal a, kan chhungkuain kan va intheh thil ta vel a.
Dini, Anu leh Sawna, downtown Cleveland.


Downtown Cleveland thlirin nu ber a thu hah chawl

Phaitual hnim fai nuam zet mai hi tuipui kamah a awm duai mai a, a faizia chu, an sil thin emaw tih mai tur a ni.

Tuipui kamah te chuan pafain kan han leng vel a.


Rock N Roll pianna hmun chu va tlawh ila..

Rock N Roll Hall Of Fame kawtah..

Hall of Fame hall kawtah chu hetiang hi an dah teuh mai..

Kei chu min induct ve dawn kher lo a, mahse tu tu nge an induct tawh en tura luhna kawngka a nih hi.

Inductee reng reng hei te hi an pe zel thin a.

Hetiang hian illuminated plate mawi tak, an hming ziak awmna an tar a.

Sting of  The Police hman hlui.



Van Halen drum set an phuah chawp belh bawnra hle.

U2 te bungrua ve thung.



Hla mawi ka tih tak Billy Joel in a phuah lai a, a kutziak original...thaichhe ve nasa khawp mai.
Hun rei tak Hall of Fame a kan hman hnuah kan inhnawh puar te te a, kan tum ram Indiana state kan pan leh ta a. Zan dar 7 velah tluang takin kan thleng a. Zanriah ei khamah tih tur awm hek lo, movie kan kal Ironman 3 kan va en a, 3D a ni bawk nen kan fate chu an phur khawp mai a. Keini tan erawh chuti ual a ni si lo.

Atuk zingah chuan Chicago chhir turin kan chhuak leh ta a. Darkar 1 zet kan tlan leh hnu chuan Chicago khawpui, "The Windy City" a lo lang ta.

Chicago, home of Skyscraper chu.

Khawpui chhung pawh a lo fai tha khawp.

Sears Tower ah kan lawn a, chhawng 103 naah glass in Skydeck LEDGE an siam a, kan va ding ve a, a langtlang vek a, a sang si a, a rapawm khawp mai.

Helaiah hian tuikhawhthla mak tak an siam a, milem a awm nghal a, a mak ka sawi thiam lo a ni ber e.

Chicago Millenium Park-ah hian The Big Bean, Cloud Gate chu a awm a, hei hi en duh an tam khawp mai.

Park velah vei vak mi chi hrang hrang an tam hle.

Nu ber pawh a tei ve nasa khawp mai.

The Great Lawn Pavillion an tih mai chu awhawm tak a ni.




Buckingham Fountain chu a hmuhnawm khawp.

Hetia kan zin ve ngialna chhan hi thil dang vak vang ni lovin Puiteii M.Sc. Nursing zir zo Graduation ceremony hmang tura zin kan ni a. A zirna hmun chu Varparaiso University, Indiana a ni.  May 19 2013 Sunday chuan Graduation ceremony chu kan hmang ta a, a pui mup mup khawp mai. He University hi Lutheran Kohhran ta  a ni bawk a, tawngtaiin hun an hawng a, tawngtai bawkin hun an khar leh a, a ngaihthatthlak bik hle. Auditorium lian zet mai, Athletic center an tih maiah chuan mipui kan khat tlat a, inkhawm tan hma fein hall kan khat a ni.



Hall chhung mipui.

Nl.Lalawmpuii Mission Veng Aizawl chuan a zirlai rim taka a zir chu a zo ve thei ta.


Graduation dinner tui tak kan kil a.

Tih tur dang awm tawh hek lo, tlai lamah chuan beach ah te kan leng a, tu dang ngai lovin  hlim takin kan hun kan hmang ta a.
Sawna'n a thiam thil a show vel..

Ni tlak dawn lai thleng chuan..

Nupui fanaute  nena hun thawl zalen hman ho hi a nuam a, a tha a, a tul ve bawk a ni.

A tuk thawhtanni chuan kan khaw lam panin zing dar 5 ah bawk kan chhuak leh ta a. Hman atanga Sawna'n a ngen fo chu Sonic Drive-In Fast Food a kal hi a ni a. Kan khaw bul hnaiah chutiang dawr chu pakhat mah a awm lo va, a hnai ber chu Ocean City ah a awm daih mai a. "Rem chang hmasa berah ka la hruai ang che," ka ti thin a. Chutia kan haw lam chu Ohio state kan lut leh ta tih ah Sonic dawr chu kan hmu ta a, kan va pan vang vang a, breakfast ang reng; lunch ang reng kan ei ta a.

A ei duh zawng a zawng mek...


Sonic food..fate te chak zawng kan tawng fuh..


Tichuan lo kal zelin tlai dar 5 velah kan khua atanga darkar khat vela hla; Hagerstown Outlet ah te kan rawn shopping haw leh a, eng eng emaw kan lei.

Hlim tak leh tluang takin kan in ngei chu tlai dar 7.30 ah kan lut ta a..hah a dam huai huai mai. Kan zin chhunga min veng rengtu Pathian chu fakin awm rawh se.

Friday, May 10, 2013

NOAH DRAMA

Drama chhuah hmain stage chu  hei hian an khuh a.
 Sight and Sound company hian USA ah hian hmun hnihah Theater lian tak tak an nei a. Pakhat chu Lancaster, Pennsylvania a ni a, pakhat leh chu Mississippi ah a ni. Heng theater ah te hian Kristian drama tha tak tak kum tluanin a chhuak thin a. Kum khatah 2 a chhuak hman tawk a. Hman kum 2006 khan Daniela kan chhungin kan en tawh a. A hnu fe kum 2009 ah Presbyterian Mizo Church in a huhovin  Josefa kan en leh a. April 20 2013 khan Mizo Presbyterian Church te chuan intiam rualin Noah kan va en leh a. A hlimawm, a hmuhnawm hle mai. Kohhran bus kan hawh a, mi 37 lai kan kal thei a, a zawng chhang thlak thin hle.

Zing dar 9 ah chhuakin darkar 2:30 kan tlan hnuah a hmun kan thleng a. Mahni lunch inpai tur kan ti a, kan thlen veleh lunch kan ei nghal a. Hlui liah kan inthen a, mahni duhna hlui hluiah kan kal a. Mahni ken ang ang kan phawrh a, chhun chaw tih tak zetin kan ei ta a.


Table 1...An ei tui viau..an puar hle.

Table 2: Tleirawl ho.....ei tur an nei tlem deuh..
Table 3:Ei tui ber leh hniang hnar ber..miten an pan khawm nasa.Zorema te, Siama te, Kimteii te Thartea te, Tluangtea ten thanhnem ngai takin chaw an ei...

Group 4: Bus driver John Travis pawhin a lunch  ei ve. Mama leh Asawna ten an titipui. John hian he Sight and  Sound hi "Broadway ai mah mahin a professional zawk" a tih mauh chu.
Hall chhung chu a lian hle a, mipuiin kan khat..Dini leh Zovi te an thu fel chiah.


Sawna leh Mama pawh an inring tawh hle. Hemi ni Mama birthday a ni bawk a. Mahse thuawih takin nu leh pa program chu a zui ve zel a ni.

Lawng lian an sa zo ta..
Nova lawngah ransa te an lut tan..


Ransate an lut kim ta..


Darkar hnih kan en hnu chuan a zo ta a..pawnah a remchang ho kan ding khawm.



Hall kawtah kan ding ho..


Hemi ni hi kan anniversary a nih ve bawk avangin kan tan a hlimawm zual a..kum 23 lai kan lo innei ve ta der mai...


Noah thawnthu hi Bible ah thui tak kan hmu lo va, mahse drama siam tute hian darkar hnih chhum lo chat lova chan turin thawnthu an siam chhuak a. An themthiam kher mai.

Noah khan lawng a buatsaih dawn lai khan nasa taka dodalna a tawk a, Pathian lah a rawn inlar nawn tawh si lo va, 'aw' a hriat vawi khat chiang em em kha a rin chhan a, project ropui lutuk a buatsaih ta a. He a rinna nasa tak mai hian ringtu inti te min cho hlein ka hria. Keini chuan Pathian aw emaw, thlarau thianghlim hriattirna emaw chan reng kan duh a, kan beisei a, kan ngaih hi a tha lo thuai thuai thin..Noah hi a va ropui em!

Noah chu a thenawm khawveng ten lawng sakna atan an tanpui nasa hle a, a then chu inhlawhfa, a then chu tlawmngaia  tanpuitute an ni a. Mahse an khaw lal in Noah a dodal nasat em avangin mite chuan Noah chu an tanpui ngam tawh lo va, an chhungkuain an buaipui ta zawk a. Noah a fate a enkawl that zia hian mi a hneh lo thei lo. An pa ber aw hriat hi an ring ngam a, an fate mai lo, an mote thleng hian Noah aw hriatah an innghat ngam a, Noah thuzawmin lawng chu kum 100 an sa a ni! Noah ang a fate, mote kaihruai hneh hi tu tu nge awm ang le?

Pathian thilmak tih te tawmpui tak tak tur chuan rinna nghet neih a ngai hle. Taimakna neih a tul a, inpekna a mamawh ngei ngei a, teirei peih a ngai a, tha thlah loh a ngai a, insum theih te, chhel te, huaisen te a ngai vek mai. Heng zawng zawng bul chu RINNA a ni a, rinna nghet neih a pawimawh em em a, rinna nghet a neih avangin Noah hi rinna PA te zinga chhiar tel a ni reng a ni. Ringtute te hian rinna kan tlachham thin, ringtu tia koh pawh kan phu lo viau thin reng a ni. Chuvangin kan rinhlelh dawn apiangin Noah hi i hrechhuak thin ang u.


Wednesday, May 8, 2013

KENTUCKY ZIN THU




April 26 2013 (zirtawpni) chuan zing dar 4 ah kan nupain kan tho va. Kan insiam sawk sawk a, ei turte kan ei lem luam a, zing dar nga a chhuah hman ngei kan tum a. Zing dar 5 a lo rik chuan kan chhuak ta ngei a, a la thim map map hle a, mahse Dodge Cavelier sedan thar veng vawng chuan Kentucky lam kan pan ta a. Internet ah chuan darkar 9 tlan angin an ziak a, mahse kan chhangchhe lo va, kan speed a hniam chhe lo bawk a. A chang chuan 90+ mph in kan tlan zeuh zeuh va, darkar 7 leh tlemah Lexington City khawdai kan thleng der mai!

Kentucky kal rau rau chuan engnge en tur awm ang tih kan ngaihtuah a. "E Toyota plant a awm an tih tak kha," kan ti a, chu chu en tumin kan pan ta nghal a. Lexington khawpui dai hmar lamah khawte deuh Georgetown a awm a, tah chuan Toyota car siamna hmunpui chu a awm a. Kan va en ve ta a lawm. A lo lian ngiang mai a. Factory in chhung chu football field 157 dahkhawm ang tiat vel an ti! Nitinin motor tam tak an siam chhuak a, thla khatah Camry ringawt hi 30,000 chuang an hralh a ni. Factory chhung chu a pui khawp a, khawpui kawtthler ang mai hi a ni a, thil phur motor khalhtu nei si lo, automated car hi a inpel suau suau mai maw le.



Motor thar a chhuak zut zut reng..

A kawt velah thla kan han la ve a..a chhung chu thlalak an phal lo.

A tuk zing chu khua a nuam lutuk lo. Mahse kan tum lak lawh tawh avangin President Lincoln-a pian leh murna en tumin kan chhuak leh ta a. Lexington atang hian darkar khat leh a chanve tlanah Hodgenville khaw te reuh te a awm a, chu khaw daiah chuan hmun pakhat, Sinking Spring an tih hi a awm a. Chu hmunah chuan kum 1809 Feb. 12 khan America President 16 na tur chu a lo piang a. Chu hmun chu en kan duh a, kan tlan leh ta vang vang a ni.





Hodgenville Town Center ah chuan Lincoln naupan lai, lehkhabu a chhiar lai lim an dah a.
Chumi ep chiahah chuan President Lincoln  lim lian tawk dang an dah bawk a. Kan kal lai chuan khawlaiah mihring tumah kan hmu lo. An khua a te ve awm khawp mai..downtown chu a ni ve lawi si a!

Lincoln Cabin bul hnaiah chuan ngaw a awm a, a velah chuan board walk ang chi nuam tak an siam a.

Hei tak hi Lincoln-a pianna hmun a humhalh chu a ni. In lian tak an sa a, chu chuan a cabin te kha an chhung khung a. A panna step hi Lincoln a kum zat chiah 57  a ni. Ka chhiar ve ngat a.

Hei hi cabin luhna chu a ni a.
Hei hi cabin pum chu a ni. A lian lo hle.

Hei hi Sinking Spring, Cabin bul lawkah hian a awm a. A hmun hming chawitu a ni a; Lincoln te chhung khan hei hi an tui tlan ber a ni.


President Lincoln kha Bible chhiar nasa ber zinga mi nia sawi a ni a. Hei an chhungkaw Bible a ni.


Kentucky kan kal chhan tak hi chu inneihna thil a ni a. Christine-i pasal nei tur lawm turin thatho takin kan kal a ni. 
Inkhawm tur chuan kan han inthuam ve a.
Inneihna Biak In hi te fel rin ren, Presbyterian Biak In a ni.



Tichuan inneihna tawi fel fai tak chu kan hmang chho ta a. A hlimawm hle.
Hei le Mopa leh Monu chu Medical Doctor ve ve an ni a. Monu hi Dr. C. Lianmawia, Ramhlun Veng fanu a ni. Mopa nu leh pa pawh hi Medical doctor ve ve an ni bawk.

Reception ah pawh chuan hlim takin kan tel ve zel a..



Dinner ei zawh chuan monu leh mopa chuan kan table te an rawn tlawh a..Table 6 kan hlim ham ham hle. (Sitting from L-R, Pu Sanga, Pi Vt, Self, Maruati, Pi Nupuii,Nl.Kimtei. Standing from L-R Tv Zorema,Pi Mabiaki, Mopa,Monu, Pi Nutei, Rev.Dr.Maruata)


He inneihna hmang tur hian Mizoram atangin Christine-i pa leh a nutei te mi panga lai an lo kal thei a, chu chuan boruak a tinuam zual. Engtikah tak Pi Roteii te Pi Nupuii te, Pi Mabiaki, Pi Dami te nen, urhsun taka Pu Mawia bawpkhawkherh kiangah khek leh uarh uarh ho ang i maw?

 Kan cham chhung zawngin Dr. Sangkima Pachuau te nupa in hneh takin min thleng a. Chaw tui tak tak min hlui reng a, a hlimawm hle. Inneih hma zan chiah hian monu thian pakhat Anne-i nu Pi Chhingpuii, Vairengte thih thu kan hre thut mai a, min barakhaihin rilru a a kap hle. Zanah chuan Mizo te chu kan thu khawm a, Kentucky ah Mizo kan tam ber lai a lo ni bawk a; kan zai a, kan tawngtai ho va, Anne-i kan thlamuan a. A tuk inneihni chuan Anne-i chuan nilengin fel takin a chanvo a ti ve leh vek thei a, a puitlingin a fakawm hle mai. Kan zin chu ram fan nen, khawhar lenpui nen, mo lawm nen kan fawmkem ta duah a nih chu.