TAR TE TE SI......

Tar te te si make up a uar i ti maw?
Vun a chuar a, hmel a lo chhia a,
Thalai aiin an mamawh zawk daih asin!

Tar te te si exer lak a uar i ti maw?
Tha a thum a, natna in a lo bawm a,
Thalai aiin an mamawh zawk daih asin!

Tar te te si zuk hmuam a uar i ti maw?
An lo ti rei tawh a, khaptu an awm ngai si lo,
Thalai aiin sim an harsat zawk daih asin!

Tar te te si ngaihzawng neih uar i ti maw?
Khua a har a, thian mamawhna a lo zual a,
Thalai aiin an mamawh zawk daih asin!

(Exer laa vawiin tlai ka tlan kual laia ka ngaihtuah)

A HMINGAH CHUAN MAKA

Chang thlan: Isaia 9:6

“ Kan tan naupang a lo piang a, Fapa pekin kan awm ta a; rorelna chu a kokiah a chuang ang a; a hmingah chuan Maka, Remruattua, Pathian Chaka, Chatuan Pa, Remna Lal an ti dawn si a.”  

Isua Krista mihring anga lo piang tur kan hmuah thiam theih nan leh, nghakhlel zawka a lo piang tur kan thlakhlelh theih nan zaninah hian Isua ropuizia leh mi bik a nihzia chhui ila ka ti a. Isaia ziakah chuan MAKA a ti tawp mai a, a mak reng a, a ropui bawk a, chung chu kan chhui tur chu a ni.

Mithiamte chuan khawvelah hian mihring 108 000 000 000 (108 billion) piang tawh angin an chhut a. Chung zingah chuan Isua hi a danglam lawr lak a. Ani tluka tantu ngah leh dotu ngah hi tumah an awm lo va, a pain tirh ata an do nghal a, tun thlengin dotu a la ngah reng a, dotu chu a nei kumkhua dawn bawk a;  Ani tluka chanchin ziah nasat leh chhui nasat hi mihring dang an awm lo va. Amah ring lotute ngei ngei pawh hian Ani tluka mihring danglam fal leh mi dangte nun hneh/ kaihruai thei hi tumah an hre chuang lo.

Khawvel mihringah hian tunge ropui kan tih ber ngaihtuah ta ila. Sawi tur hi an vang a sin. Mi thiam tam tak chuan Sir Isaac Newton kha ropui an ti hle a, scientist ropui berah chuan an puang thei a. Mahse thil dangah engmah a ni lo. Blaise Pascal chu philosopher ropui ber tia hriat a ni a, mahse thil dangah engtihnamah a ni leh bawk lo. Heng miropui pahnihte hi Isua tana mi rinawm tlut ve ve an ni lehnghal a. Isua hi mihring dang nen khaikhin ve dawn ta ila, Isua hi chuan Ama category hi a nei hrang tawp mai a, tuman chutah chuan han teh phak chi a ni ve lo, a chungnung hliah hliah mai a ni.

Isua chu sawiselbo a ni tawp mai a. A zuitute tan chauh sawiselbo a ni lo va, Amah hawtu leh bei beitute pawhin sawiselna tur an hre chuang lo. Chuvang chuan Ani tan chuan thupha chawi te, ngaihdam dil te, sual sim te, thu zai zap te engmah a tul ve lo. Tlang takin dik takin a nung tawp mai  a ni.

Isua hi MAKA tih loh theih a ni lo;  a chhan hrang hrang te:

1. Bible sawi angin a nu Mari chu mipa pawl loh a ni a, Isua nu hi nula thianghlim virgin a ni a, chumi hrin chu a ni. Mihring dang reng reng chutiang an awm ve lo.
2. Mahni sahimna atana thiamthu sawi hi  mihring nih phung a ni a, Isua chuan vawi khat mah a thiamthu a sawi ve lo va. Ringtu ropui dang Paula te Petera te hi chuan an thiamthu an sawi a, insawi fihlim an tum fo mai. Isua chiah hi mahni insawi fihlim tum ve lo chu a ni.
3. Khawvelah sakhua tam tak a awm a, an zawlnei leh sakhaw hotute hi khawvel tan, an mahni zuitute tan an thi ve lo va, Isua chauh hi a ni.
4. Sakhaw din tu hrnag hrang leh zawlnei te pawh an thi a, mahse kan Lalpa Isua Krista chauh hi thihna hneha tho leh, thi hlen lo chu a ni a. Midang zawng zawng chu an  thi hlen vek a ni.
5. Isua mak ropui em emna chu hming a ngah lutuk hi a ni. Gandhi chu a ropui em avangin India chuan Hnamte Pa tiin a vuah a, hming dang a neih awm pawh kan hre lo. Isua erawh chuan Bible a lang chin ngawt pawh hming 25 chuang zet a nei a. Bible a lang pha lo, Amah duhtute vuah leh kohna phei chu a tam lutuka sawi sen a ni lova, an la phuah thar reng lehnghal a. Bible a lang chin chu, Engkim tithei, Pathian Chaka, Thu chu Pathian a ni, Lal leh Pathian, Pathian Ropui, Chhandamtu Isua Krista, Maka, Remruattua, Chatuan Pa, Remna Lal, Alpha leh Omega, Hmasabera leh Hnuhnungbera, Pathian hriakthih, Krista, Pathian Fapa, Jehova, Abul leh Atawp, Lalpa, Chhandamtu, Mi Thianghlim, Mi tin Lal, Emanuela, Kawng leh Thutak leh Nunna, Lalte Lal, Pathiante Pathian.

ISUA MAK CHHAN HI ENGNGE NI TA?

Heti taka Isua Mak ta mai hi a chhan i zawng dawn teh ang aw...

1. Nu leh pa ropui tak a neih vang em ni? Ni lo, A pa chu thing mistiri, a nu chu nula pangngai mai a ni. Engmah ropuina bik leh milenna hran an nei lo.
2. An hausak em vang em ni? Ni lo, Isua hian hausakna chu sawi loh eng mah a nei lo va, a pianna pawh mi ran in, an phumna pawh mi thlan hawh chawp, a kawrfual pawh mi ta bawk, mahniin neih a nei lo.
3. A zir san em vang em ni? Ni lo, zir sang turin Isua hian sikul pawh a kai miah lo.
4. A zin zau em vang em ni? Ni lo, A dam chhung khan mel za bial bak a pel miah lo, zin zau lo tak a ni.
5. A nih ram ropui taka a khawsak vang em ni? Teuh lo mai, Nazareth ram palai leng leh thingtlang khua mai mai a seilian a ni a, ram ropuia sei lian a ni teuh lo mai.
6. A nih thian a nei tha viau tal em ni? Teuh nang aw, a thiante chu mi mawl te te sangha mantute leh misual chhiah khawntute an ni mai.
7. A nih leh mipuiin an ngaihnat em vang em ni? Ni nang aw..sakhaw hotute zawng zawngin an do va, thah an tum a, tum tam tak a bihruk a ngai a ni.
8. A dam rei vang em ni? Ni nang le..dam pawh a dam rei hlei nem kum 33 mi niin a thi.
9. Rawng a bawl rei tal em ni? Mai mai a, kum 3 leh a chanve chauh rawng a bawl hman a, mihring tehnaah chuan a hlawhchham der maw le.
10. A nih pawl a din tam hman viau em ni? Ni lo, Kohhran chu pakhat a din ngei a, mahse chu lah chu a thih hnua piang chauh a ni si.

ISUA ROPUIZIA CHU MAW..

1. Moral Influence: Isua moral influence hi a chak khawp a, Amah duhtute, Amah zui duh avanga piangtharte hi sual sawt an awm ngai lo va. Nun tha lo leh misual ten Isua an pan chuan an lo tha sawt zawk a, an nun sual an sim ngei ngei. A thusawi leh Ama chanchin te miin a hriat chuan an nun a her danglam nghal thei a, A kaihruai theih loh khawpa sual leh luhlul a awm theih loh, chuti khawpa chak chu a ni.

2. Artistic Influence: Amah avanga thu leh hla pian tam phah zia te hi kan ngaihtuah ngai em. Hla sawi sen loh Isua chungchang phuahna, thuziak tam tak sawi sen loh Ama chanchin ziahna a awm a, a awm thar reng bawk a. Keimah avang hian mi tuin emaw tak hla pakhat tal a phuah ve tawh em tih te, ka chnchin tha lam ziak hian mi te hian thu leh hla an ziak tawh reng reng em tih te ka ngaihtuah chang hian Isua ropuizia ka hre chhuak thin. USA a Library of Congress ah hian lehkhabu  tam tak a awm a, mi pakhat chanchin tam ber chu Isua chanchin ziahna bu a ni an ti.

3. Humanitarian Influence: Isua avanga khawvel mihring thil tha kan tih nasat zia hi i ngaihtuah ngai em? Amah avanga damdawiin tamzia te, Recue centre, Help center tamzia te, Voluntary leh Mission hna hrang hrang Amah vanga miin an mihringpui te tana an thawh nasatzia te hi kan ngaihtuah ngai em. Thil tha ti turin Ama hming chawiin miin an hun zawng zawng an hmang ral thin a sin.

4. Devotional Influence: Isua avanga thih huam thi tawh te, la dam thih huam te, Isua avanga nei chan huam, insengso huam; nupui pasal neih loh pawh huam mihring tamzia te hi a mak a ni.

5. Scholastic Influence: Isua avanga zirna lama mihringin hma kan sawn nasatzia te hi kan ngaihtuah ngai em. Sikul tam tak Amah avanga din te, Amah avanga missionary ten lehkha an zirtir te. Sikul, College leh University Ama hming chawia din a tamzia te hi ropui tak a ni. Khawvela University tha ber ber, Harvard te Princeton te Yale te ang te hi Isua vanga ding leh awm ani vek a ni.

6. Impact on Woman: Hmeichhia te tan Isua thawh hlawkzia te hi kan ngaihtuah ngai em? Juda ho ten hmeichhia an ngaih dan chu kan hria. Mizo pa dik tak ten hmeichhia kan ngaih dan pawh kan hria. Chuti chunga heti taka hmeichhia lo zalen ta leh an hamtha ta te hi Isuan an thlavang a hauhsak nasat vang kan ti lo thei lo.

7. Freedom and Justice: Isua avanga khawvela remna leh muanna awm nasatzia te hi tunlai khawvel buai Muslim ho vanga kan tawrhna hunah phei hi chuan a chiang zual ta hle mai.  Isua zirtirna mi zawng zawng hi bul thuhmun leh unau, inang tlang leh intluk tlang kan ni tih hi khawvel ram ropui ho UK, USA te danpui ruahmanna bul thut a a ni a. Chu chu Isua zirtirna atanga indin a ni.

Chuti taka mi ropui leh dangdai chu kan tan a rawn piang dawn ta a, a hlu a, a lawmawm a, hlim taka hmuak tur kan ni reng a ni. Mosia hmangin Pathianin mihringte hnenah dan sawm a pe a, a har lutuk a, kan hre thiam thei lo. Chuvang chuan ngilneihnaa khat kan Pathian chuan instruction manual chauh ni lovin a hrilhfiahtu tur a fapa Isua Krista  rawn tir tel ta a, Ani hian kan fiah loh te, kan hriat thiam loh te, kan chian loh laite min hrilhfiah thei dawn ta a ni.

He Krista lo piang tur hi mitin tan  ni a, mi rethei ber leh mawl ber tan a ni a, mi fing ber leh mi sang ber tan pawh a ni. Mi zawng zawng tan anih ang ngeiin i tan leh ka tan  a ni a, Ani hian kan sual zawng zawng a  phur vek dawn  a ni. Chuvangin a ropui a, he mi MAK lo piang tur hi hlim leh lawm takin i hmuak ang u. Amen.

(December 24 2013 zan Kohhran Inkhawmah thuhril rawngbawlna hun ka chang ve a. Chutah chuan he thu hi ka sawi a. Thu ka sawi hian ka sawi tur tlangpui ka ziak den den a, a bak chu ka sawi tawp mai thin a. He ka thusawi hi ‘ka ziak chhuak ang’ ka ti reng thin a. Mahse ka puitlin thei lo. Hei kuminah Krismas kan thleng leh tak ngial dawn a, ka la hriat reng te chiang lo ruai deuh tawh mahse ka khawn khawm a, ka ziak chhuak ta hram a. Ka sawi lai a boruak ang kha chu ka pha ta lo deuh tih chu hai rual a ni lo. Khalai spirit kha ka hloh then tawh a, ka reference te pawh ka chiang tawh mang lo va, ka phuai luai ta hle mai a, apawi hle.

He ka thusawi ngaihnawm ti taka lo ngaithlatu leh, “Han ziak chhuak la, a copy min pe ve ang che aw” min titu Rev. Lalthanzaua chu kumin khan he lei ata Pathianin A ramah a hruai ta daih a, ka van ui tak em! Ka thatchhiat avangin ka thuziak a chhiar hman ta lo. Pawi ka ti hle mai. Engpawh nise ziak chhuak tura min duhtu Pu Zaua avang liau liau pawhin ziah chhuah a phu a, chuvangin ‘tha chu tha nge nge’ ti chungin zanin chu kan hel nuai leh ta a nih hi, chhiartu zawng zawng Lalpan malsawm che u rawh se)

NAUSEN ISUA (One Act Play)

( Rimawi a ri a...Screen a inhawng a. Ran in a lo lang a. Light a eng lutuk lo, bangah meichher an chhi a. Chiang vak lovin Josefa leh Mari lu a lang a, Rimawi a fade down a)

Mari: 

Ka pum chu a na sawt khawp mai a..hui hui…

Josefa: 

I hring hnai hle a nih dawn chu,  vawiin kan kal hah em mai a, a awm viau bawk e...chauh pawh i chau viau ta ve ang….tuar hram hram rawh....lum i ti em kan zap dawn che mi..i tui te a hal em?

Mari: 

Hui hui hui...Tui tlem ka lo in ang (Tuithawl tui an intulh a)..Hmm ka nuam huai mai. A ...ka in zo vek mai!

Josefa: 

A pawi lo,  khawi ...a dang kan zawng thuai ang ( tuithawl a la a, a tlan chhuak nghal a, theih chuan footstep sfx awm se.) Khawiah nge tui ka dil ang aw..(fade up music)

Mari : 

(fade down music) Josefa chu a va rei em aw.. awi awi.. a mak lutuk awi..ka tui a baw hawk hawk mai..Josefa khawnge i awm? Lo kal thuai rawh!

Josefa : 

( A lo tlan lut a, a thaw hlawp hlawp a) Mari... heta hi ka lo kal….. engtin nge i awm..? (A va kuah thuai a)  San a pe elo? Khai khai i hring dawn tawh a nih hi...aw.. aw.. ti khan sang vak rawh aw sang vak rawh..

Mari: 

Ka sang thiam lo.. hui hui hui…

Josefa: 

A dik ti khan… aw…  i thiam lutuk a.. aw.. naute a lo chhuak dawn a lo chhuak dawn...a.. a lo chhuak ta..(naute a tap ri nghal raih raih a) a.. a piang ta hlawl mai, ha ha ha..naute kan nei ta...ka van lawm em…. ha ha ha...

Mari : 

Engtin nge naute chu a awm, a pian a tha em? A fuke te a kim em.. sam a nei em khawi maw ka hmu chak lutuk..

Josefa : 

(naute chu a pawm chhuak a, sang takah a chawi sang a, a virpui a, ring takin) Lalpa Jeho min hruaitu kan lawm e, naute min pek avangin kan lawm e.. .

( f/u/m - Halleluia Chorus hla music thui lo te play in f/d se) Mari  kha le naute chu pawm rawh le...en teh a hmeltha asin aw…

Mari: 

A nih hi a  va han duhawm tak em (F/u/m low vol. and linger on) Lalpa i bawihnu ka ni, i thu ang zelin ka chungah thleng rawh se..f/d/m)

(Pawnah eng nasa tak a lo eng ta pup a, rimawi heavenly deuh a awm bawk a, Josefa leh Mari an hawi phawk hle a, mak tiin an za ta cheng a)

Josefa: 

Shhh... Mari ( phun riin) Pawnah sawn eng nasa tak ka hmu..eng thil nge ni ta?

Mari: 

(Hlau thawng aw takin) Ka hmu a lawm...Heroda’n naute that tur a rawn tir em ni ang..(hlau thawng leh zualin) Awi ..heta kan awm hi tunge hre reng reng a..Josefa tu emaw tal kan chanchin hrilh i nei em? Engtin nge an hriat aw...

Josefa : 

Tumah kan chanchin ka hrilh lo ...ti khan lo thu la... thla bar miah suh..eng thil nge a nih ka va chian ang e..(a tho them them a, dimtein a kal a..pawn a va hawi ruai ruai a, a lo let leh a) Mari… hlauthawng  suh..Van lai zawlah khian arsi eng em em mai a awm a, kan in chung zawn takah hian a ding reng mai.. mak lutuk… rawn en ve teh..khawi naute kha mut la .. ka kai ang che..

Mari: 

Tak tak maw? (naute a mut a. Josefa chuan Mari chu a kai tho va, a pawm phei a..van arsi eng nasa tak hnuaiah chuan van lam enin an va ding a (rimawi a lo ri a..) Lalpa bawihnu ka ni, Lalpa I bawihnu hnam tlawmzia i hmu a, mi khawngaih a, tunah erawh thang thar zawng zawngin nihlawh min ti tawh zawk dawn a ni. Mi chak khan ka chungah thil ropui tak a ti ta si a ( an inpawm let leh ta a, slowly f/d/m) En teh Josefa naute hi a va han tlei em em….a felzia hi i hmu em mak tak a ni..

(Chutih lai tak chuan pawn lamah, mifing pathum an lo ding tawh a)

Balthasar: 

Arsi dinna chu helai in tak hi a nih hi..( A kawk va a) Thiante u han thlir teh u...a nih theih hmel em? (Van lam an hawi a, an lehkha zial te chu an keu a)

Casper: 

Lal Heroda inah kan zawng tawh a, chutah chuan kan hmu lo va, helai hmun hi tlawmin awm ang  lo viau mah se, hruaitu Arsi-in a chhun  miau si a.( An kal kual that that a, an thlir kual vel a, awm zawk dang a hmu si lo) He in ngei hi chu a nih hmel..

Melchior: 

Hetiang hmunah Lal thar a piang dawn a nih ngai chuan Lal thar mak danglam tak zawng a ni ngei ang le. Eng ang Lal thar nge ni dawn ni; hmuh a va chak awmin, ngawi teh u ….a va zamawm lawi si ve.

(In chhung lama Josefa ngaihtha lo,  thawm hre deuh chu dim tein a lo phei a, pawna mi ding reng chu a rawn hmu zawk a, Mari hnenah a let thuai a)

Josefa: 

( Zawi sap hian) Pawnah sawn mi ropui hmel tak tak an ding thuau mai a.. min ti chhe tura lo kal an ni thei ang em aw..

Mari : 

Chutia lo, engzat nge an nih, ralthuam te an keng em ( Naute chu a pawm rawk rawk a) Awi kei zawng hlauthawng reng rengin kan awm a...Lalpa i bawihnu hi min thlahthlam lul suh..

Josef: 

Pathum an niin ka hria, ralthuam an ken leh ken loh ka hre lo va.. mahse kan hnena lo kal tur pawh an ni kher lo mai thei. Engpawh ni se, ngawi rengin thawm nei miah lovin i awm phawt teh ang…(A reh thiap a chutih lai tak chuan naute a rawn tap ta thut a, a nu leh pa chuan tap thlem ban tumin nasa fein tan an la a, naute tap chu a reh thuai a) Shhh shhhh...

(Pawn lamah chuan)

Balthasar: 

A….chu ngaithla teh u.. ka hriat chu naute tap ri a ni lo maw? Kan kal dik a va ang ve..han ngaithla teh u..(an ngawi vang vang a..naute chu a rawn tap leh a)

Melchior: 

Uhmm.. kan kal dik ngei e..Ka tih reng kha he Hruaitu Arsi hi a daw ngai lo..a kan zui tirh te atang khan a la kal sual hauh lo nia..a zuituten kan ngaih dan kan hman avangin kan kal sual zawk mai kha a ni a...haw u i lut tawh mai ang u..

Casper: 

Nang Pu Balthasar hma han hruai la, upa chan changin hma han tawng teh khai..

Balthasar: (Ring leng lawngin) In awm em? Nau piang chibai buk turin kan lo kal..

(In chhungah)

Mari : 

(Phun ser serin) Josefa min tiboral tura lo kal an ni ang a.. rawng taka nausen chibai buk tum an ni lawng maw?

Josefa : 

Mari ka hre bik lo…Nausen chibai buk turin kan lo kal an ti miau si a, tute nge an nih pawh hre lo mah ila  va dawnsawn chu an tha lo maw….khawnge ka va hmuak ang e..( thawh mai a tum a, a tawi leh deuh va)

Balthasar: In awm em? Nau piang chibai buk turin kan lo kal,  kan lo lut thei em?

Mari: 

Josef, ka hlau em mai.... awi engtia tih chi nge ni ang...Vantirkohvin  ‘Mari hlau suh Pathian ngaihsak zawng i ni e’ min tih kha maw….i  hlau lo phawt teh ang. Josef va kal la, va hmuak rawh ..Jehova’n a awmpui ang che..

Josefa :

( A thova hmuak turin a kal a) Pu te u, Kan awm e.. ka lo kal e..( A va hmuh ve leh) Thlamuanna in hnenah awm rawh se... tute nge in nih a, khawi lam kal tur nge in nih a, tun ang hunah kan hnen in lo thlen tak?

Balthasar: 

Thlamuanna in hnenah pawh awm rawh se.. Ka hming chu Balthasar a ni a, ka thian te hi Casper leh Melchior te an ni. Hei khawchhak ram hla tak atanga lo kal kan ni a. Arsi mak takin min hruai a, helai hmun hi min hruai thleng a, Lal thar lo piang chibai buk kan duh a ni, min khawngaih la, min hmuhtir hram rawh.

Josefa:

Aw a ni maw…(In chhung lam hawiin) Mari.. Mari...khual tha an ni e .. hawh u...lo lut rawh u, in chau awm nasa si a.. ( Mari chuan nausen chu ran thlengah a mut leh mek a, Mifingte in chhung an luh rualin Arsi eng a chuai a) Ka hming chu Josefa a ni a, hei hi ka nupui hual Mari a ni a, kan nausen hming tur hi ( drum roll ang chi rimawi) ISUA a ni e..(f/u/m...Mifingte chuan an thil pek chu nausen hmaah urhsun leh khunkhan takin thingthiin an chhawp a, chutah an bawkkhupa nausen chibai an buk a,  f/d/m  fx; sobbing, lawm avanga lungchhe takin, ring takin an au a  )

Hnam tin tana lo piang Lal thar hmel kan hmu ta!

Ani chuan khawngaih leh hmangaihna in mi tin ro a relsak ang a;

Amah ringtute a chhandam dawn si a.

Lalpa Jeho kan hahchawlhna min siamsak tak avangin i hming fakin awm rawh se..

(Mifingte an lo ding chhuak a, inpawmin thlamuanna an inhlantawn a)

Casper: 

(f/u/m) Tunah chuan Lal thar kan hmu a, chibai kan buk ta, thlamuang takin kan haw thei tawh ang.

Melchior: 

Thinlunga lawm chungin kan haw ang a, kan zawn kan zawn; kan nghahfak Messia kan hmu ta si a.

Balthasar: 

Kan dam chhungin he Lal thar tan hian kan nung ang a, kan neih kan sum leh thiamna te Ama tan kan hlan zel ang. He Messia lo piang hian sual bawih ata min chhanchhuak dawn si a..

Josefa: 

Him tak leh thlamuang taka haw turin ka duhsakna ka hlan a che u (mifingte leh Josefa te an inthlah a, Josefa chuan mifing te an kal liam thlengin a thlir reng a; mifing te an kal liam hnu-ah  f/d/m)

Khualbuk vengtunu: 

( A lo lut hlawk hlawk a) Thawm luai luai ka hria a, ka lo kal vat a ni, eng thil nge ni ta?

Josefa: Hei beisei ruk ang ngeiin  Mari’n  nau chu a hring ta nge nge a...mak tak maiin khawchhak atangin nausen chibai buk tur an lo thleng nghal a..(A sawi lai mekin)

Khualbuk vengtunu: 

(Mifingte thilpek chu a hmu a, a pan a) Awi awi awi...heng te hi khawi a mi nge? Ka rei ka rei….( thil pekte chu a va chul a, a pawm a) heng te hi an rawn pe em ni? Awi awi awi… a va han mak em em ...heng te hi engnge a nih in hria em? (Rangkachak tlang chu a lek chhuak a)

Mari: 

A rawn petute kha mi ropui tak tak an nih hmel a, an hausak hmel khawp mai a...chuvangin thil hlu thawkhat tak ni turah kan ngai mai...en pawh kan lo la en chiang hlei nem…

Josefa: 

Ni e.. tah khan an hung a, kan lo ka en chhin miah lo a ni tak e…

Khualbuk vengtunu: 

Awi aw… in va han lai lung mawl mang tak em!! Hei hi rangkachak hlawm a nih hi.. a man to dan tur zia chu aw… in chhut chhuak phak lo ang..khai aw.. ka va han awt tak em! Nangni hian eng atan tak hmang ang che u maw? Keiman nei zawk ila a tha ang…Awi ka duh lutuk..( a pawm a, a fawp a) muah muah...

(Chutih lai chuan pawnah thawm a lo awm a, beram be ri te, tawng ri nuaih nuaih te a lo awm a)

Awi chu mi dang an lo kal leh.. mi hausa dang bawk an ni ang..khawnge ka lo inthiar fihlim ang e (tiin thilpek chu a dah rawk rawk a; a chhuak ta hlawk hlawk a. A chhuah fel chiah hnu chuan Berampute mawl helh hawlh tak maiin an lo lut a, luh pahin)

Mika : 

Ngawi teh Simeon Van zaipawl hla sak ang khan han zai leh teh, mawi ka ti em em mai a; mahse ka sa ve thiam si lo..nang chu i lo thiam hman bik a...

Simeon : 

Chungnung berah Pathian ropui takin awm rawh se, 

Lei chunga a lawm em em mihringte hnenah remthu leng rawh se…

Mika : 

A van mawi tak em..ka thinlungah a cham reng mai…

Joela: 

Hei khawnge kan awm? Khawnge Lal chibai kan buk tur chu..

Simeona: 

Hey Joel… thawm dim hle ang che..Lal thar chibai kan buk dawn a, i nung chang mawi ber i lantir a ngai a, Lal hmaa i awmin thil mawi lo reng reng i insum hram hram vek ang.... i hria em?

Joela: 

Ka hria e.. ka hria e..

Josefa : 

Shalom shalom in chungah thlamuanna awm rawh se…

Mika: 

Shalom.. thlamuanna in chungah awm rawh se.. ka pu hei beram vengtute kan ni a, zanah beram kan ven laiin van zaipawl an rawn zai thut mai a, kan vel zawng zawng chu e.. a en hian a eng pup mai a...he hla hi an rawn sa a.. a mawi em em mai a...zaipawl ropui tak a ni . .. hla chu maw hei ka thianpa hian a sa thiam, han sa leh teh Simeon.. kha hla mawi tak Vantirhkoh Zaipawl sak tak kha...thuai vat.

Simeona: 

Chungnung berah Pathian ropui takin awm rawh se,

Lei chunga a lawm em em mihringte hnenah remthu leng rawh se,

(tiin thiam takin an sa a)

Mika: 

Chu hla chu an rawn sa a, tichuan, “Hawh u Bethlehem khaw thlengin kal ila, Lalpa’n thu min hrilh lo thleng chu i en ang u,” kan ti a, hei kan lo kal vang vang a ni. Nausen Lal thar lo piang min entir theih chuan kan lawm khawp ang.

Josefa: 

A nih tak chu, hei nausen thar chu en mawlh rawh u..( Berampuho chuan nausen chu an pan a; hnai te ah an va en a, an kil tiau a)

Mika : 

Simeon, Vantirhkoh khan engtin nge a sawi kha….nausen puan nema tuam… a ni ang a ti em ni kha   hei ...he nausen hi puan nem chuan an tuam ngei mai a...engnge a dang a sawi leh kha..ih ih.. ka hre ta miah lo.

Simeona: 

Ih englo..kan ngaihtuah lawk...ih… e ka hre leh..ran chaw pekna thlenga mu a tih kha..

Mika: 

Aw...a dik chiah

An pathumin: 

( A rualin) Hei ngei hi a nih hi…...hei puan nemin an tuam a, ran chaw pekna thlengah a mu bawk ( ha ha ha..)  kan kal dik lutuk (hlim em emin an nui hawk hawk a)

Joela: 

Nausen hi ka khawih chak tlat, ka khawih dawn…(khawih tumin a ban a)

Simeona: 

Mai mai a, Joel i kut balh balh nen va beng fai phawt rawh..

Joela: 

( a kal fal a, a kut chu a va beng khu tulh tulh a)  A fai tawh..

Simeona: 

I mawng te  kha beng fai nghal rawh..

Joela: 

( a mawng te chu a beng khu rum rum a) Engmah bal a awm lo.. ka fai vek…

Berampute: (A rualin, nausen hmaah an thingthi a)

Ro hlu leh thilpek engmah hlan tur kan nei lo,

Kan neih chhun kan thinlung lawm takin kan hlan e,

Hnam tin te tan chhandamtu lo ni la,

Keini pawh min chhandam ve ang che…(f/u/m)

Mika: 

Lal thar chibai kan buk theih avangin kan lawm hle mai. Lawm takin kan nitin hna kan thawk leh thei tawh ang a… kan tin tang e…

Josefa: 

In chungah thlamuanna awm rawh se.. Lalpa Jehovan vengin awmpui che u rawh se..

(Josefa in chhung a luh hnu chuan f/d/m)

Joela:

Khawi nge, Lal en tur in tih chu..Lal ka hmu lo reng reng..

Simeona: 

Kha.. naute kha i hmu em? Kha kha Lal thar lo piang mi zawng zawng an sual ata chhandamtu tur a nih kha…

Joela: 

Chuti maw?? Lal a ang lo e.. a mak e.. nausen mai mai a ni si a! (an nui dar dar a) ..Kei chu maw.. kha nausen hmaa thil mum lian pui ka ka duh e..ka lo en char char a.

Simeona: 

Kha kha maw..rangkachak a nih kha a to viau ang...Beramno pathum hen chu a ni hrim hrim…

Joela: 

Han nei ila chu aw...Berampu tiangah kan chher tur a nia…(an nui dar dar a)

Mika: 

Engpawh ni se, Lalpa chu kan hmu ta, lawm takin i haw ang u, kan duh ber kan hmu ta si a…

(An vaiin an zai a, he hla hi an sa a:)

Ka va lawm em Lalpa Isu,

Min tlan tura tlawma i lo pian le,

Chibai ka buk pha lo’ng che kei rethei hian,

Lal in leh hmun sang rawn thlang lang,

Ka hmu pha lawng che kei misual hian,

Lal in leh hmun sang rawn thlang lang.

Chorus:

Tunah hlimin ka khat, ka zai dawn,

Ka Lal chibai ka buk avangin,

Tunah lawmin ka khat, engvang nge?

Ka Pathian ka hmuh tak avangin...

(Hlim taka zaiin berampute an chhuak a. Stage khar a ni a)

========================================================================

He drama hi kan Kohhran Mizo Presbyterian Church (MPCUSA) thalai ten nikum 2013 khan min ziahtir a, Dec 2013 khan an chang nghal bawk a. Lighting leh stage prop te an tawk nalh a, an costume a nalhin an zir uluk nen an thiam khawp mai a. Entute pawhin hmuhnawm an ti ve hle. A dialogue zawng zawng leh sound effect leh background music zawng zawng hi kan record sa vek a, a lem chan zan chuan kan play tawp a, chumi mil chuan actor te hian an lo mime tawp mai a ni. Thim tham deuh rik reka chan a ngaih avangin a zia phian a. A dang dai hle bawk. A tawp hla thluk mawi taka min siamsaktu Tv. Awp-a Mission Veng,Aizawl,India; ka request hnial ngai miah lo chungah ka lawm em em a ni.

==========================================================================

Casting:

Josefa: Tv. Siama

Mari : Nl. Maruati

Khualbuk vengtunu: Nl.Janet-i

Balthasar: Tv. Nelsona

Casper: Tv. Akawla

Melchoir: Tv Peka

Mika: Tv. Puipuia

Simeona: Tv. Mama

Joela: Tv. Tluanga

Music operator: Tv. Zorema

Lighting controller: Tv. Valtea

Costume i/c: Nl.Janet & Teboihi

Stage prop i/c: Nl. Teboihi & Sentea

Stage director:  Tv. Zorema
==========================================================================